الرئيسية

عبد الهادي بلخياط: «نقدر نغني في حفلة خاصة .. ما يكون غير الخير»

حاورته: بشرى الضوو
السلام عليكم ورحمة الله تعالى وبركاته..
وعليكم السلام ورحمة الله.. شكون؟.. شكون؟
كيف عامل انتينا؟
الحمد لله.. شكون معاي؟
معاك مدام الصفريوي.
الصفريوي؟
آييه.. مدام الصفريوي غزلان.
آش خبارك آ لالة بخير؟
بخير الحمد لله.. عرفتي من كثرة حبنا ليلك سافرنا عندك من فاس حتى للرباط باش نتفرجو فيك في «موازين».
باراك الله فيك.. باراك الله فيك.. الله يحفظك.. باراك الله فيك ألالة.. الله يبارك فيك.
الغناء الملتزم حنا محتاجين ليه.
ذلك من فضل الله.. ذلك من فضل الله.. ذلك من فضل الله سبحانه وتعالى.
ونعم بالله.. السي عبد الهادي بلخياط عندي بنتي الكبيرة انتينا مول الخير غادي نديرو ليها الحفلة ديال التخرج.
(مقاطعا): مزيان.. مبارك مسعود.. مبارك مسعود ألالة.
الله يبارك فيك.. بغينا نديرو حفلة ليها نفرحو بيها وبغيناك أنت تحيي ليها الحفل إن شاء الله.
إيوا آبنتي عرفتي ما بقيتشاي كنعمل هادشي هذا.. أنا غير عملت هذاك النموذج ديال الغناء باش يمشيو عليه الشباب.. هذا هو اللي كاين.
لا.. ولكن الحفلة غادي تكون خاصة وغادي يحضروها بعض الطلبة من زملائها وبعض الناس من علية القوم.
واخا إن شاء الله وقتاش هادشي غادي يكون بعدا؟
إن شاء الله من مور شهر رمضان إذا كتاب سيدي ربي.
واخا إن شاء الله.
شوف كون هاني ومطمئن.. الحفلة غادي تكون خاصة جدا، غادي نحرم عليهوم يجيبو التلفونات باش ما يصوروكش وغادي نكتافيو بتصويرك مللي كتغني الغناء الملتزم بحال «المنفرجة»، ومللي تغني العاطفي كلشي يطفي التلفون.. كون هاني حتى واحد ماغادي يعيق.
لا.. لا.. آبنتي هادشي مافيهش يعيق ولا ما يعيقش.. المهم تاصلي بيا مللي يفوت رمضان إن شاء الله.. ومبارك هاذ الشهر بعدا.
الله يبارك فيك.. ويعود عليك بالصحة والعافية.. الله يخليك بغيت غير نعرف شحال كتطلب؟
لا..لا.. أنا ماتكنطلبشاي.
إيوا لاواه زعما غادي تغني لينا هاكذة لله في سبيل الله.. انتينا فنان كبير ولازم علينا نكرموك.. زعما بغينا نعرفو شحال كتاخذ في «الكاشي».. عندك مدير أعمال ندويو معاه؟
لا..لا.. أنا ماكنطلبشاي ألالة.. إذا غادي نجي غادي نجي لله في سبيل الله.. وشي دعاء إن شاء الله.
دابا انتينا عارف حفلات التخرج مامحتاجينش فيها غير للدعاء بوحدو.. راك عارف دابا الشباب كيبغي ينشط ويستمتع بأغانيك العاطفية، وكيفما قلت ليك هاذي حفلة خاصة جدا ماعندكش منين تخاف.
واخا ألالة.. نبغي نعرف واش غادي يكون الجوق؟
غادي يكون واحد الجوق ولكن إذا كنت قررت تجيب معاك الفرقة ديالك، أحسن، ياك؟
إن شاء الله أللا.. إن شاء الله.. هذا هو التلفون ديالك أللا؟..
آييه أسيدي هو هذا؟.. (يسمع صوت رجل يحدث عبد الهادي بلخياط بصوت خافت)، قبل أن يستطرد قائلا:
سمحي ليا أللا نبغي نعرف شكون الصفريوي أللا؟
أنا مدام غزلان الصفروي.. ساكنة في فاس ولكن زيادة وخلوق في كازا.
دابا هادشي غادي يكون عندك في فاس ولا هنا في كازا؟
لا.. الحفلة غادي نديروها في فاس إن شاء الله.
يكون الخير إن شاء الله.
شوف راه اشتاقينا نسمعو منك «ماتاقشي بيا» و«قطار الحياة» و…
إن شاء الله يكون الخير أللا.
بنتي كتحماق عليك آ السي بلخياط.. وهذا هو كادو نجاحها بلا ما تخاف وزايدون غادي نتهلاو فيك مزيان.
إن شاء الله أللا.. يكون الخير أللا.. تلفونك ها هو عندي وغادي نعاود نتاصل بيك.. عواشر مباركة أللا.
الله يبارك فيك آ سيدي.
أنا نعاود نتاصل بيك حيث معايا شي ناس.. ما يكون غير الخير (ثم يقفل الخط).

رد فعله لدى اكتشافه المقلب
يقول: «أنا مابقيتش كنغني داكشي وليت كندير غير الدعاء».

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى