الرئيسية

فهيد: غادي نلبس حوايج لعيالات ونحتج على سليم الشيخ علاش مادوزنيش فـ «دوزيم»

حاورته: بشرى الضوو
ألو مساء الخير..
مساء الخير.
نجم الفكاهة في المغرب.
مرحبا.
معاك غزلان بناني، أنا صحافية في مجلة جديدة سميتها «monsieur charmant »
Monsieur charbon؟
Monsieur charmant.
(ضاحكا): شارمون.. شارمون.. زعما آنا شارمون؟.. مزيان.
وعلاش لا؟.. هاذي مجلة فرنسية غادي تصدر نسختها العربية هنا في المغرب، فكرنا فيك باش تكون نجم شهر رمضان غادي نخصصو ليك 10 ديال الصفحات.. كل شهر كينفذ معانا الضيف فكرة متعلقة بكل عدد، يا إما دعما للشباب أو دعما لمرضى السرطان أو مرضى السيدا أو… والضيف كيخصص لينا من وقتو يومين باش ينفذ معانا الفكرة، وكيكون عندو مقابل مادي باش ماكانضيعوش ليه وقتو.
مزيان.. مزيان.
هاذي مجلة جد مشهورة في فرنسا سول عليها صحابك في فرنسا هوما يعاودو ليك عليها.
(ضاحكا): واخا.. واخا آحنينتي.. زيدي.
نقول ليك الفكرة ديالك؟
زيدي!
في المغرب صورة المرأة المغربية كتاكل الدق؟.. متافق معايا؟
كملي.. كملي.. ومن بعد نجاوبك..
واش متافق معايا كتاكل الدق ولا ولا؟
(منزعجا): وأنت كملي كملي.
أوكي.. حنا كنعرفوك فنان فكاهي كبير وكتقدر تؤدي جميع الأدوار وسبق ليك أديت دور امرأة.. الفكرة هي أنك تلبس حوايج امرة ونديروك في غلاف المجلة، وفي نفس الوقت نتناقشو حول وضعية المرأة في المغرب، دعما منك للمرأة المغربية؟
(ساخرا): نلبس حوايج ديال لمرا؟.. علاش؟
دعما للمرأة المغربية.
(مستمرا في سخريته): لا داعي نلبس حوايج لمرا.. نجي ونتحاور معاك حول الموضوع.. بلا ما نلبس حوايجها.. الله يا الشريفية الله.. الله يا الشريفية مابنت ليك غير آنا.. كاع الفكاهيين فهاذ البلاد السعيدة خليتيهوم ما بنت ليك غير أنا نلبس حوايج ديال لمرا.. الله يخلف عليك، ولعواشرهاذي.
الله غادي يخلف عليك أنت إذا قبلتي هاذ الدور.
إذا كنت نؤدي دور في فيلم أو مسلسل متافقين، أما باش نكون غلاف في مجلة الله يا حنينتي الله.
شنو دابا موافق ولا ماموافقش؟
دابا واش عندك شي بيرو نجيو نتناقشو فيه احسن من التلفون.
طبعا عندي.
صافي صيفطي ليا التلفون ديال البيرو نعيط ناخذ رونديفو ونجي عندك نتذاكرو.
راك كتدوي مع المسؤولة.
متشرفين آ الشريفية.. هذا تلفونك الشخصي؟
آييه.. واش نعتابرها موافقة مبدئية؟
ممكن .. ممكن.. (قبل أن يستطرد قائلا): لا.. لا.. آالشريفية واش شايفة المصيبة اللي واقعة دابا بغيتيني نلبس حوايج لمرا؟ واش انت شوية لاباس.. حنا طفرناه حتى فحوايج الرجال باقي لينا غير حوايج لعيالات..؟ ضحكتيني ومرمدتيني.. نديرك في الغلاف ونلبسك حوايج لمرا واش انت هبيلة؟.. باغية تدوزي بيا رمضان.. هادشي ديال نبيل عيوش نكملو آنا.
لمرا فيها امك واختك وبنتك، علاش ما تكرمهاش بهاذ الطريقة.. مافيهاش حتى شي مشكل؟
(ساخرا): مرحبا.. الله يخلف عليك آبنيتي لعواشر هاذي ونايضة مع «دوزيم» والفيلم وتزيديني آنا.. الله يخلف عليك آبنيتي.. إلا مايبداو يدوزو بيا التراوح.. آه يا ناري ناري.
ماتاخدش الأمور بهاذ الحساسية آ سيدي.. بالعكس في أوروبا رجال جربو الحمل باش يكرمو لمرا.
(غاضبا بشدة): لا.. لا.. مايمكنش مايمكنش.. حيث ماداخلة حتى في سياق، واش أنا غادي نلبس حوايج لمرا ونبان في الواجهة؟.. مزيان تبارك الله.. عواشر مباركة دخلات عليا هي هاذيك.. صافي غادي يقولو هاهو لكطها (بتثليت الكاف).. هاهو راه دايع في الجرائد ماخدام ما ردام.. راه لبس عليهوم امرا.. كتعرفي العقليات.. حيث سياق النقاش ماشي هو هذا.
كلشي عارفك راجل.. شنو زعما خايف يقولو عليك وليتي مريوة؟
(ضاحكا): واه يا ناري ميمتي.. راه غير كتلبس امرا ماكيبقاش المنظور ديالها زعما غير دور أو فهيد كيدعم لمرا.. غادي يقولو هاذي «إيبولا» صابت الممثلين تخلاو على حوايجهوم ولبسو حوايج لعيالات.. لا إله إلا الله.. دعوة لعواشر كتكون مقبولة.. آه يا ناري هاذي هي التكميطة (بتثليت الكاف).. ينساو نبيل عيوش وينساو «دوزيم» وينوضو ليا آنا.
شنو المشكل؟.. زعما هاذي أول مرة كتلبس حوايج امرا.. ياما لبستيهوم.. رجولتك ماغاديش تقاس بغلاف مجلة.
(منوحا): واش أنت هبيلة؟.. غادي يقولو واه يا ناري غادي يقولو السي فهيد مشا فيها.. واه يا ناري ما ديالوش هاذي.
جرب أنت ماخدمتيش هاذي عامين.. غادي يجيب ليك الله رزيق زين.
(غاضبا): واش أنت شوية لاباس؟.. غادي يقولو شي فقصة هاذي حيث مادازش في رمضان راه لبس حوايج لعيالات باغي يمشي لـ»دوزيم».. بغيتيني حتى أنا نشمر ونلبس واحد الجلابة وواحد الفولار وواحد الصندالة مايبان ليا غير سليم الشيخ ونفرش ليه تما حدا لبيرو ديالو في «دوزيم» ونبدا نغوت ونوح: واك واك آ عباد الله جاتني جاتني على سليم الشيخ.. جيبوه ليا الليلة يخرج عندي.. كنموت عليه وأعشقه وكنبغيه.. «je te le t’aime».. ونحتج على السي الشيخ علاش مادوزنيش في «دوزيم» هاذ رمضان.. والله حتى راكي شوية لاباس.. الله يعاونك ألالة (ثم يغلق الخط).
تتصل به الصحافية من جديد لتكشف له المقلب.

رد فعله لدى اكتشافه المقلب
يرد ضاحكا: «آ مرحبا ألالة خليتيني كندورها في راسي وخليتيني كنتخيل راسي لابس حوايج لعيالات وساير نغوت».

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى