شوف تشوف

كون تحشم

كان إلقاء الأمين العام لحزب العدالة والتنمية لتقريره السياسي أمام أعضاء المجلس الوطني لحزبه مناسبة لمحاولة تبرير فشله في المهمة التي كلفه بها الملك، أي تشكيل الحكومة، وكان اللقاء أيضا مناسبة لتعليق هذا الفشل على شماعة الآخر.
ولعل المثير للشفقة هو لجوء الأمين العام لحزب العدالة والتنمية إلى الكذب وتزييف الحقائق وقلب المعطيات دون أن يرف له جفن، والمصيبة أن الناس يصدقونه حتى وهو يكذب في وجوههم.
قال بنكيران إنه «حين ذهب الملك إلى أديس أبيبا ساعتها لم نعد نفكر في شيء آخر، وجمعنا الأحزاب لافتتاح البرلمان ولم نعترض وتركنا الأمور تسير»، ما تحشمش تكذب، ياك حتى تاصل بيك الملك وعطاك أمر باش تسرع تشكيل هياكل البرلمان عاد ناضت فيك الحراقية وخرجتي من دارك ومشيتي جتامعتي بالأمناء العامين للأحزاب، وفالتصويت على رئيس البرلمان لحتو الورقة بيضا، وملي جيتو لتشكيل الهياكل بديتو تسابقو على المناصب، وخدا يتيم رئاسة لجنة الخارجية باش يبقا يسافر فالعالم على حساب دافعي الضرائب.
ثم تساءل بنكيران «هل تعطيل تشكيل الحكومة المقصود به إهانة حزب العدالة والتنمية»، ما تحشمش، شكون اللي معطل تشكيل الحكومة ماشي نتا ؟ ياك الملك عينك نتا باش تشكل الحكومة، إلى فشلتي كولها وقدم استقالتك، لاش كاتقلب فمن تلصقها ؟
وبنكيران قال «لا حاجة لنا بانتخابات سابقة لأوانها حتى وإن كان وضعنا الانتخابي سيتحسن بها، بل نحن في حاجة لشوية من المعقول ومن العفة ومن القناعة، باركا».
ما تحشمش، هاد الشي اللي درتو هادي خمس سنين فيه شي معقول؟ الشفرة زادت، الرشوة زادت، الفقر زاد، البطالة زادت، غي نتوما تبارك الله اللي بانت فيكم آثار النعمة، اللي كان عايش محشر فالسكن الاقتصادي شرا الفيلا فالهرهورة واللي كان مكشتر فحالتو كرط اللحية وربى الكرش وزاد المرا الثانية.
وزايدها بالهضرة على العفة ونتوما مكايناش شي ميزانية ما كليتوش منها ووكلتو صحابكم فالحزب.
وباركا نيت، راكم طلعتو فالراس.
وقال بنكيران إنه «حين يتعلق الأمر بالوطن فإن حزب العدالة والتنمية ينادي الوطن أولا، وإذا اقتضى الأمر أن نضحي حتى برئاسة الحكومة لصالح الوطن فنحن مستعدون».
وشنو كاتسناو بالسلامة باش تديرو هاد التضحية ؟ ألا يتعلق الأمر الآن بالوطن ؟
ماشي الوطن اللي كايخلص ثمن هاد التماطل فتشكيل الحكومة من صورتو وسمعتو يوميا ؟
وشكون بحالك، نتا متكي فدارك كتضرب فالمسمن والحرشة والبرارد والمانضة ديال 13 مليون دايزة فالكونت، والشعب المكحط كايضرب فتمارة على جوج فرنك فالشهر وبارك عليه نتا بالهضاضر الخاوية اللي ماتعمر قفة ما تخلص فاكتورة.
ثم قال بنكيران «لا بد من تأكيد الوفاء والمصداقية والفعل بين ما نكتبه وما نتوافق عليه وبين ما نطبقه في حياتنا اليومية، مستدلا بقوله تعالى «يا أيها الذين آمنوا أوفوا بالعقود».
ما تحشمش، ياك كنتي هاز شعار القضاء على الفساد والاستبداد، وملي تبلاصيتي كرطتي اللحية وضربتي علينا الكرافاطة وهزيتي شعار عفا الله عما سلف، هادا هوا الوفاء بالعهود ؟
ياك تعاقدتو مع المغاربة إلى صوتو عليكم غادي تخدموهم وغادي تصلحو التعليم والصحة والعدل وغادي تحاربو الرذيلة، وفالأخير هلكتو التعليم العمومي الأساسي والثانوي والجامعي، درتو مدارس خصوصية ديالكم كاتقريو فيها ولاد الشعب بالفلوس وعطيتو رخص للجامعات الخاصة ورسلتو ولادكم لتركيا يقراو بفلوس تنظيم الخدمة، والصبيطارات ديال المخزن رديتوها كفس من الزبالة وعطيتو الحق لمالين الشكارة يبيعو ويشريو فالصحة ديال المزاليط.
أما الرذيلة وليتو عايشين بيها، مداخيل التبغ والقمار والشراب ولات هيا اللي هازة ليكم الميزانية وكلها زاد الاستهلاك ديالها فهاد خمس سنين اللي حكمتو فيها.
أما العدل حياك الله حتى ولا الرميد كايشد حتى القضاة صحابو، اللي كانو كايكتبو ليه تقارير على اختلال محكمة النقض، متلبسين بالرشوة.
ومن الفوق زايدها بـ «نعتز أننا تمكنا من إنقاذ المالية العمومية من العجز والارتهان للخارج واستعادة التوازنات الكبرى الاقتصادية والمالية وإنعاش الاستثمار العمومي، نعتز أننا تمكنا من إعادة الاعتبار للصناعة والتصنيع».
ما تحشمش ؟ شمن عجز نقدتي المغرب منو ؟ نتا غرقتي المغرب ماشي نقدتيه، فالعهد ديالك زادت المديونية خمسين بالمائة، يعني بلغة الأرقام كرمتينا فواحد عشرة ديال الملاير ديال الدولار هاكاك.
واش إنقاذ المالية العمومية من الارتهان للخارج هيا تزيد من مديونية المغرب من 22,04 مليار دولار كانت فعام 2011 باش توصل 32 مليار دابا ؟
واش ماشي هادا هو تأبيد وتأكيد الارتهان للخارج ديال بصح ؟ على من كاتضحك أسي؟
بنكيران قال إن «الرأي العام يميز جيدا ويتساءل عن المنطق الدستوري أو السياسي الذي يجعل من المستساغ أن يصبح حزب لم تسعفه نتائجه الانتخابية يدعو إلى القفز على الدستور ويوقف مسار تشكيل الحكومة ويهدد بأن الحكومة إما أن تكون به أو لا تكون ويطرح نفسه كحزب ذي كفاءات لا يمكن أن تستقيم الحكومة إلا بها خصوصا في التوجه الإفريقي للدولة حاليا».
طبعا بنكيران عزيز عليه يقلز من تحت الجلابة ولذلك ما قدرش يسمي الحزب اللي كايقصد، وهو فالحقيقة كان كايهضر على التجمع الوطني للأحرار، ولكن واش التجمع حاط ليك السيف فوق عنقك باش تدخلو معاك للحكومة بزز ؟ مادخلوش أسيدي، جري عليه، دير هاد الحكومة بلا بيه، لاش نتا لاصق فهاد الحزب اللي فنظرك الزعيم ديالو ما عندو ماضي سياسي ومكايعرفش يسير، نتا اللي غي شركة ديال جافيل ضربتي ليها الخلا وديتيها للإفلاس اللي كاتعرف للتسيير، الراجل كايسير هولدينغ خدامين فيه 4000 ديال البشار وعايشين معاه مئات الآلاف من العائلات فالشركات ديالو وعشر سنين وهو وزير ديال قطاع حساس ومعقد بحال وزارة الفلاحة والصيد البحري وكاتكول عليه ما عندو تجربة.
أسيدي نتا وهادوك الوزارا ديالك اللي عندكم التجربة، شي دار ناموسية ودوش فالوزارة ديالو، شي قلبها عشق وغرام فالديوان ديالو، شي رد الوزارة وكالة أسفار فينما كان غادي لشي بلاد فالعالم ضروري ما يدوز على دبي يدير الباروك.
شفتي أسي بنكيران إلى كنتي فعلا كاتقلب على مصلحة المغرب شنو خصك دير، سير ترتاح ليك وخلي الحزب ديالك يختار شي أمين عام بعقلو، يقابل مزيان العمداء ورؤساء الجهات اللي تحت تصرف الحزب، راه نهار يحسو بيكم المغاربة خدامين فالأحياء ديال المدن ومناطق الجهات غادي يصدقو الشعارات ديالكم وغادي يصوتو ديك الساعة عليكم، حيت هادو اللي صوتو عليكم فالانتخابات البلدية والتشريعية راهم ماشي الشعب المغربي ولكن شعب العدالة والتنمية، أي ديالكم فديالكم، حيت الشعب المغربي اللي ناض كايهضر بسميتو راه ما صوتش أصلا.
فبلا ما تجي دابا تكول لينا أنكم صالحتو المغاربة مع السياسة، حيت راه الحقيقة هيا أن المغاربة ملي كايشوفوكم باركين بلا خدمة وكاتخلصو بالملاين فالشهر على ظهرهم كايتكرهو منكم ومن السياسة والانتخابات وكل ما يجي منها.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى