سعيدة شرف: «ماجاش الضعف مع أسماء لمنور وسهام أسيف حمقة»

سعيدة شرف: «ماجاش الضعف مع أسماء لمنور وسهام أسيف حمقة»

حاورتها: بشرى الضوو
ألو.. سعيدة شرف الفنانة المحبوبة اللي كنحماقو عليها.
آييه أللا مرحبا وألف مرحبا.. شكرا.. شكون معايا؟
معاك الدكتورة نسرين العلوي.. أخصائية حمية غذائية.
(تحاول التذكر): دكتورة نسرين.. دكتورة نسرين.. دكتورة نسرين.. اسمحيليا ما عاقلاش عليك.
لا..لا.. ماكتعرفينيش.
شوفي دكتورة غادي تسمحي ليا عندي شي معالمية في الدار ديري واحد السويعة وتاصلي بيا.
واخا أللا.. (تعيد الاتصال بها الصحافية بعد مرور ساعة من الزمن).. فترد.
ألو.. نعام آ دكتورة.
أنا أخصائية في الحمية الغذائية وقد توصلت بحبوب تخسيس من أمريكا وفكرت فيك.. قلت لماذا لا تجربيها وتسوقيها معنا إعلاميا؟
بالصح؟.. وشحال ديال الوقت وتبان ليا النتيجة؟
كتبدا تذوبك من النهار الأول غادي تولي تباني بحال الخويط.
لا مانبغيش نولي بحال الخويط.. نبغي نرجع أقل من دابا بـ15 كيلوغرام.
مالك آختي شفتك غلاضيتي بزاف فاش غنيتي في «للا لعروسة».. ماجاش معاك.. وليتي كتباني خايبة؟
حيث كناخذ الدوا يا الله درت «FAUSSE COUCHE» (أجهضت جنيني).
ولكن الدوا ديالنا إذا خديتيه غادي تولي ضعيفة بزاف.
لا ما نبغيش نضعاف بزاف.. حنا في الصحراء ضروري الفورمة تكون عندنا.. ما نبغيش نولي عاود ثاني بحال أسماء لمنور.. ما جاش معاها الضعف نهائيا.
صافي تافقنا آ حبيبة.. تبان ليك النتيجة وتسوقي المنتوج معانا إعلاميا؟
ماعنديش مشكل.. تبان ليا النتيجة نعاونك.
ولكن خاصك جرأة كبيرة باش تاخذي هاذ الحبات ديال الضعف.. كيخافو منها في أمريكا؟
علاش كيخافو؟
بحال بعض الناس كيخافومن «دردك» كاين اللي كتجي معاه كاين اللي لا.. تأثير الدواء حسب أنسجة من يستعلمه؟.. نجربوه فيك ويحن الله.
أويلي على تجربي فيا.. علاه مالي حماقيت؟..
نقدرو نتفاهمو..
مافهمتش كيفاش زعما نتفاهمو؟
نجرب فيك إذا وقعات ليك شي حاجة نعوضك؟
توقاع ليا شي حاجة تعوضيني..؟ مال الدنيا كلو ما يعوضش ليا راسي.. أنا مللي درت العملية درتها على صحتي.. ماشي على الغلض.. أنا صحراوية وراضية بالشكل ديالي كيف هو.. أنا كنت مللي حملت بولدي غلاضيت درتها على صحتي.. ماشي للتجميل باش نبان قدام الناس زوينة.. الناس نهار عرفوني في الأول عرفوني غليضة وعاجباهوم غليضة.. شوية ديال الرياضة كنضعاف.. أويلي وحدي على تجري فيا؟ جبتي ليا الضحك..
علاش جبت ليك الضحك؟
والله حتى جبتي ليا الضحك.. أويلي وحدي على تجربي فيا.
تاصلت قبل منك بسهام أسيف قالت ليا لا آختي وقالت ليا شوفي سعيدة شرف هي اللي غادي تبغي.
لا..لا.. هاذي أسيف هاذي راه حمقة حشومة عليها.. ما نبغيهاش آختي.. أنا كنحساب شي ريجيم زوين باش نضعاف في فترة قصيرة.
ولكن راه ما جاش معاك الغلض.. وليتي كتباني خايبة.
راجلي باغيه ولدي باغيه والجمهور ديالي باغيه.
ماكتحركيش مزيان في الخشبة فاش كتغني؟
(ضاحكة) بالعكس أنا هي اللبوءة ديال الخشبة..
شوفي أنت ماشي فأرة تجارب.. انت فنانة تقدري تضحي من أجل جمهورك.
جمهوري كيبيغيني كيف أنا وراضية بيه كيف أنا وكنموت عليه كيف أنا..
تجي عندي للعيادة؟
سمحي ليا ما نجيش عندك.. ماشي تقليل منك ولكن ما نقدرش نمشي لشي بلاصة نضر فيها راسي والناس.. حيث أنا ماشي ديال راسي بوحدي.. لا شكرا غير استعمليه أنت.
راسك قاصح بحال سهام؟
سهام فنانة شحال هاذي ماهضرت معاها كنقدرها واخا تعايرني أنا كنقول ليها الله يرحم بيها الوالدين.

رد فعلها لدى اكتشافها المقلب
(تتفاجأ ثم تقول ضاحكة): «الله يعطيكم العذاب الأليم.. أقسم بالله العلي العظيم كون كنتي قدامي حتى نضربها ليك بنتفة والله حتى نتفك بالله.. أنا من نيتي كنهضر.. ما غلطت حتى فواحد. خدمت معاكم مؤدبة مزيان».

نبذة عن الكاتب

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *