عمر السيد: سيصفونني بالشاذ جنسيا إن ارتديت سروال «طاي باص»

عمر السيد:  سيصفونني بالشاذ جنسيا إن ارتديت سروال «طاي باص»

حاورته: بشرى الضوو
ألو.. عواشر مبروكة..
الله يبارك فيك أللا.. شكون معايا؟
أنا نسرين.. صحافية بمجلة جديدة اسمها «للا بوتي».
مرحبا آ بنتي.
أريد منك مشاركتنا في تنفيذ فكرة دعما للشباب، قد تبدو لك مجنونة.
مرحبا.
هل سبق لك أن شاهدت الحاجة الحمداوية ارتدت ملابس عصرية؟
آييه.. شفتها.
الفكرة هي أن ترتدي ملابس «هيب هوب» ونصبغو ليك شعرك إن شاء الله بلكحل؟
إن شاء الله ولكن هاذ لوقيتة شوية فشي شكل.. هاذ الظرف اللي فيه فيلم عيوش والدعارة وهاذوك اللي تعراو في الصومعة.. صعيب نفذو هاذ الفكرة.
آشنو هو المشكل؟
غادي يقولو عليا «homosexuel» (شاذ جنسيا).
اسمح ليا راك غالط شوية.. بالعكس غادي يقولو عليك كتدعم الشباب والموجة الجديدة.
مللي غادي تصبغي ليا شعري بلكحل، آشنو الاستفادة؟
مابغيتيش تصبغو نديرو ليك باروكة.
إيوا والسلام.. آشنو هي الإضافة؟
غادي تدعم الشباب..
الشباب خاصهوم شي حاجة اللي تنميهوم.. مللي غادي تصبغي ليا شعري بلكحل في نظرك مزيان؟
طبعا مزيان.. يبان ليا السي عمر السيد شخصيا صابغ شعرو بلحكل ولابس حويجات «الهيب هوب»، غادي نفرح وغادي يفرحو كاع الشباب.
كي غادي نلبس هاذ لحويجات وفي الوزن ديالي 110 كيلو؟
«البيغ» فيه 200 كيلو وكيلبسهوم عادي.
هذاك الستيل ديالو.. هو داخل في هذاكشي من النهار الأول.. «البيغ» زايد في 1984 وأنا زايد في 1944.
ولكن تقدر تديرها من أجل الشباب؟
(يرد بسخرية): واخا واخا دابا نشوفو… إن شاء الله غادي نشوفو ديك الساعة ويحل الله.
ياكما بغيتي المقابل؟ نقدر نشوف مع الإدارة تخلصك..
(غاضبا): أنا هضرت معاك في شي مقابل أللا؟.. ما هضرتش معاك في المقابل.. زعما غير تعطيوني الفلوس تديرو فيا ما بغيتو؟
لا.. حاشا واش نديرو فيك ما بغينا.. وزايدون أنت عطيتيني موافقة مبدئية.
لا.. باقي ما وافقت.. غير كنتصنت ليك.. فكرة زوينة ولكن ماشي وقتها دابا.. هاذ الأخلاقيات.. هاذوك النصارى اللي مشاو كيتصورو عريانات وعيوش.. ماشي وقيتها هاذا.
حنا ما بغيناش نلبسوك حوايج لعيالات.. غير سروال «طاي باص» و«الهيب هوب»؟
هاذي وجهة نظرك أحترمها وأنا عندي وجهة نظري في شكل آخر.
عافاك غير شوف كيفاش تدير إذا ما قبلتيش غادي يطردوني، قالوا لي إذا قنعتيه بالفكرة غادي نرسموك.
لا..لا.. هادشي ما فيهش تقنعيه ولا ماتقنعيه.
شوف عوض لهجهوج غادي تصور بالقيثار وغادي نرسمو ليك «طاطواج» في يديك.. كلشي هادشي من أجل الشباب.
إن شاء الله.. دابا ندورها في دماغي مزيان ونتشاور مع أصدقائي ونعاود نتاصل بيك آبنتي.
الله يرحم بيها الوالدين وافق على هاذ الفكرة.. دير فيا هاذ الخير..
الخير اللي ندير فيك هو إذا عندك شي عملية ديال شي حد مريض نتعاونو معاه أما هادشي ما فيه لا خير لا والو.
الخير، بالنسبة لي، هو توافق باش يرسموني إن شاء الله.
(ساخرا): إن شاء الله.. تلفونك هذا آ بنتي..؟ دابا نعاود نتاصل بيك.
صافي آ عمي نمشي للإدارة نقول ليهوم راه موافق.
(ساخرا): لا..لا.. قولي ليهم مبدئيا موافق.. غير خاصو يتشاور مع عائلته وأولاده.
أنا نعاود نتاصل بيك في لعشية..
لا.. ما تاصليش بيا.. أنا اللي غادي نتاصل بيك.
شوف إذا ما كنتيش موافق غير قلها ليا من دابا بلا ما تبقا تجرجر فيا.
قولي ليهم راه ما موافقش هضرت معاه وراه ماباغيش.
الله يرحم بيها الوالدين الله يخلي ليك صحيحتك.. عافاك وافق.
تقولي ليا الله يرحم بيها الوالدين إذا ما خلاوكش تخدمي نمشي معاك للباطرون ونقول ليه يرجعك تخدمي.. ما شي الله يرحم بيها الوالدين تلعبي بيا كيفما بغيتي.. هذا شكل آخر..
ما توقفش ليا في مستقبلي الله يرحم بيها الوالدين.. أنا باغية نصور طرف د الخبز؟
(غاضبا): كيفاش تصوري طرف د لخبز بيا..؟ سيري آ بنتي تلعبي ولا تقراي.. تصوري طرف د لخبز بيا وتلبسيني اللي بغيتي؟ سيري آبنيتي تقراي ولا شوفي شي خدمة اللي غادي تناسبك.
أنا يا الله لقيت هاذ لخدمة حتى واحد ما قبل عليا.
إيوا بغيتي تديري ليا هاذ لفضيحة أنا باش أنت تخدمي؟!.. هذا اللعب آ بنتي.. (ثم يقفل الخط).

رد فعله لدى اكتشافه المقلب
يضحك ثم يقول: «يا الله لقيتيني كنعاود لأولادي على هادشي وكنضحكو.. عواشر مبروكة».

نبذة عن الكاتب

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *