شباط: « ولدي ماشي حشايشي وأنا موجد مزيان لهاذ المساخيط ديال الإسلاميين»

حاورته: بشرى الضوو
السلام عليكم آوليدي..
وعليكم السلام ورحمة الله تعالى وبركاته أللا.
كي داير لاباس؟
لاباس الحمد لله.. مالك؟.
أنا آ وليدي مواطنة كنتاصل بيك من هنا من فاس مريضة شوية.
الله يشافيك أللا.
خاصني شي فلوس إذا كان ممكن..
علاش شنو عندك أللا؟.. باش مريضة؟
المرض الخايب.
آااه..
الله يرحم بيها الوالدين عاوني وعطيني شي بركة راه لعواشر هاذو.
لا.. واش دوزتي عند الطبيب؟.. آشنو درتي؟
أودي تخلاو عليا كلشي؟.. فين هوما فلوس الطبيب آالسي شباط؟.. كتداواو وكتعيشو غير نتوما؟
دابا أنت واش كتقلبي على شي حل ولا باغية شي حاجة أخرى.
أنا باغية لفلوس.
مامشيتيش للمستشفى الجامعي باش يشوفو معاك؟
لا ما عنديش الفلوس آ السي شباط وحنا كنصوتو عليك؟
مزيان.. باراك الله فيك.. دابا حنا كنشوفو المرض أش غادي نديرو ليك فيه.. مامشيتيش عند الدكتور العمراوي.
أنا كنقول ليك ماعندي فلوس وانت كتقول ليا الدكتور العمراوي.. بحالك يحال ولدك نوفل.
(غاضبا بشدة): مالو ولدي؟
نفس لهضرة قالها ليا.. وقال ليا عاودي تاصلي بيا ومابقاش كيجاوبني !!
لا.. غير مسافر.
آشمن مسافر يا الله بان ليا كيدور.
لا..لا. راه مسافر.. غير كيتخايل ليك.
آ ودي راهوم قالو ليا عليه حاجة اخرى الله يعفو عليه.
آشنو قالو ليك؟
الله يسمح ليه ويعفو عليه مسكين.. حتى زين ما خطاتو لولة.
آشنو قالو ليك عليه؟.. غير قولي؟!
والله حتى حشمت نقول..
انتينا غير قولي.
قالو ليا عليه كيتحشش ومبلي بالمخدرات.. داكشي علاش كيهضر مع بنادم في التلفون وكينسى آش قاليه مللي كيكون مرفوع.
(غاضبا): لا..لا.. ولدي مسكين ماكيكمي حتى كارو باقي ليه غير يتحشش.. إيوا البهلان هذا !!.. الكارو ماكيكميه.
قالو ليا راه تشد في الحبس كاع لقاو عندو المخدرات؟
أعوذ بالله ما عندو حتى قضية.. عندي تبارك الله اربعة ديال الوليدات انتينا قولي ليا مع شكون دويتي.
مع لكبير فيهوم نوفل المحابسي.
(غاضبا): دابا أنت بغيتي تداواي وفي نفس الوقت كتعايري ليا ولدي.. مزيان.. تبارك الله.
انا كنقول ليك الناس آش كيقولو عليك هنا واخا هاكذاك أنا واثقة فيك وغادي نصوت عليك.
واخا مزيان.. أنت فين ساكنة؟
في عين قادوس.
شنو سميتك؟
سميتي يزا.
إيوا سميعيني أللا يزا.. ولدي نوفل ماكيكمي حتى كارو واللي قالها ليك راه غير كذب عليك.. والقضية ديالو غير تخربيق.. باقي شي قضاء؟.. فين هو القضاء؟.. ماكاين لا قضاء لا قضية.. ولدي قضيتو سالات هاذي 6 سنين هادشي جبدوه قبل انتخابات 2009.. هذاك راه الماضي.. خاصنا نشوفو آشنو غادي نديرو دابا مع هاذ المساخيط ديال الإسلاميين.. أنا موجد ليهوم مزيان.
شوف واخا يكون ولدك كيشم الكوكايين أنا ناصراك في الانتخابات عطيني غير الفلوس؟
واخا.. مزيان.. من هنا لتما عندنا هضرة أخرى.
ودابا غادي تعطيني لفلوس باش نتداوى؟
إذا بغيتي تداواي سيري للصبيطار الفلوس ما نقدرش نعطيك دابا..
قالو ليا كتولي ظريف والله يعمر ليك الدار قبل الانتخابات.. تبارك الله عليك.
ظاهرة عليك باغية شي حاجة أخرى الله يهنيك أللا.
(ثم يقطع الخط).
نعيد به الاتصال عدة مرات دون مجيب.

رد فعله لدى اكتشافه المقلب
تتصل به الصحافية من رقمها فيرد بعد اكتشافه المقلب: «أويلي.. أويلي.. دابا الواحد يبدا يحضي راسو مع شي حد كيقول ليه مريض في التلفون».