الرئيسية

وزير الحكامة.. يديرو ليه المقر «فسطاسيون دليصانص»

بالنسبة «لبيزوطاج» وزير الحكامة الجْديد، خاص أولا يبدلو السْمية ديال هاد الوزارة، لأنو لا يعقل يكون سْميتها «وزارة الشؤون العامة والحكامة»، بيْنما هي لاصْقة غير فشؤون خاصة وحدة مكتخرجش عليها، ومكتنوْعش فالاختصاصات شوية.. وكنقتارحو يولي سميتها «وزارة سطاسيونات المازوط وشلاضة والبطاطا قصبية وماطيشة وسنيدة والسكر القالب». حيت هادو هوما الاختصاصات الحقيقية ديالها، أو على الأقل هادو هوما «الاختصاصات» اللي شفنا مْع الوزير الحالي، اللي كيدرْدر سنيدة فالبرلمان. أما من جهة أخرى ودائما في إطار «البيزوطاج» للوزير الجديد، يُستحسن ينقلو ليه الوزارة ديريكت لقلب شي «سطاسيون»، وبلاصتْ يبقى يتسنى المواطنين يتشكاو من غلاء المحروقات، ولا النائب «بلافريج» يطرح شي «إحاطة علما» فالبرلمان، غيوْلي «سعادتو» غي يضرب طليلة من الشرجم ديال البيرو، تبان ليه الأثمنة. ويلا بغيتو كاع تكملو خيركم فهاد البيزوطاج، يا حبذا لو تختاروا ليه شي «سطاسيون» جات حْدا شي «مارشي ديال الخضروات»، والخضّارين كيغوْتو بصوت مرتفع، بطاطا مية وستين، مااااطشية مية وثمانين، البيض ربعين جوج بثمانين، وْهاكّا سعادة الوزير غيبقا ديما «آ جوغ» فهادشي ديال الأسعار والقدرة الشرائية.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى